Иако современите телефони често имаат одредено ниво на отпорност на вода, тоа не значи дека се целосно водоотпорни. Дополнително, морската вода е особено проблематична поради солта и другите нечистотии што можат да придонесат за корозија.
Прво извадете го од водата и исклучете го
Првиот чекор е едноставен: извадете го телефонот од водата што е можно побрзо.
Ако е вклучен, исклучете го. Не отворајте апликации, не проверувајте ја камерата, не пуштајте музика и не притискајте го екранот повеќе од неопходното. Целта е да се намали можноста водата да предизвика дополнителна штета додека уредот е под напојување.
Извадете ја маската и избришете ја надворешноста со мека, сува крпа.
Не го тресете силно телефонот. Исто така, не притискајте ги копчињата без потреба, бидејќи така течноста потенцијално може да навлезе подлабоко во уредот.
Морската вода е поголем проблем од обичната вода
Тука е важно едно нешто: не е исто ако телефонот падне во базен, мијалник или море.
Морската вода содржи сол и други минерали кои, откако водата ќе испари, можат да останат на компонентите и да придонесат за корозија. Затоа производители како Apple и Samsung имаат посебни препораки за уреди што биле изложени на морска вода.
Apple, на пример, наведува дека iPhone што дошол во контакт со течност што не е обична вода треба да се исплакне со вода од чешма, а потоа да се исуши. Samsung, исто така, советува солта и другите нечистотии да се отстранат со чиста вода по изложување на морска вода.
Ако уредот има декларирана отпорност на вода и не е оштетен, површините што биле во контакт со морската вода може внимателно да се исплакнат со чиста слатка вода, а потоа да се избришат.
Ако телефонот нема декларирана отпорност на вода, има напукнато куќиште или екран, или претходно бил отвoран и поправан, не треба да експериментирате со дополнително изложување на вода. Во тој случај, побезбедно е што побрзо да побарате стручен сервис.
Оставете го природно да се исуши
По бришењето, ставете го телефонот на суво место со добра циркулација на воздух. Ако е можно, држете го приклучокот за полнење свртен надолу за евентуалната течност полесно да истече.
Apple советува уредот нежно да се потчукне од дланката со конекторот свртен надолу, а потоа да се остави на суво место со добра циркулација на воздух.
Може да помогне и ладен воздух од вентилатор.
Она што никако не треба да го користите е фен за коса, особено на висока температура. Топлината може дополнително да ги оштети компонентите и заптивките.
Не се препорачува ниту компримиран воздух, бидејќи силниот млаз може да ја потисне течноста подлабоко во телефонот.
Никако не приклучувајте го веднаш на полнач
Една од најчестите грешки е телефонот веднаш да го ставиме на полнач за да провериме дали сè уште работи.
Дури и кога однадвор изгледа сув, влагата може да остане во USB-C или друг приклучок, како и во внатрешноста на уредот. Полнењето во такви услови може да предизвика корозија или електрично оштетување.
Apple наведува дека, ако iPhone детектира течност во конекторот, треба да се почека најмалку 30 минути пред повторно да се обидете да го поврзете кабелот. Ако предупредувањето повторно се појави, сушењето може да трае и до 24 часа. Компанијата, исто така, изречно советува телефонот да не се суши со надворешен извор на топлина.
Затоа не постои универзално правило како „почекајте точно пет часа“ што важи за секој телефон и секоја ситуација. Колку повеќе уредот бил изложен на вода, толку е поважно да му се даде доволно време целосно да се исуши.
Заборавете на трикот со ориз
Ставањето на телефонот во ориз можеби е еден од најпознатите интернет-совети, но не е препорачана метода.
Apple изречно предупредува iPhone да не се става во ориз, бидејќи ситни честички може да влезат во конекторот и да создадат дополнителен проблем.
Освен тоа, оризот не го решава главниот проблем кога телефонот ќе падне во море: не ја отстранува солта и не ја запира евентуалната корозија на компонентите.
Наместо сад со ориз, многу е покорисно телефонот да се остави на суво место со добра циркулација на воздух и да се почека целосно да се исуши.
Кога сепак треба да одите во сервис?
Ако телефонот бил само кратко во вода, има соодветна заштита и по целосното сушење функционира нормално, можно е да нема сериозни последици.
Сепак, посета на сервис се препорачува ако телефонот подолго време бил потопен, ако нема заштита од вода или ако куќиштето претходно било оштетено или отвoрано.
Обрнете внимание и на симптомите што може да се појават по инцидентот:
- телефонот не се полни или се полни невообичаено бавно;
- екранот не реагира како што треба;
- камерата се замаглува или не работи;
- звучникот или микрофонот почнуваат да работат полошо;
- телефонот невообичаено се загрева;
- уредот сам се исклучува или рестартира;
- се појавуваат проблеми што претходно не постоеле.
Кај морската вода постои уште една причина за претпазливост: последиците од корозијата не мора да се појават веднаш. Телефонот може да продолжи да работи, а проблемите да се појават подоцна.
Ако проработи веднаш направете резервна копија
Ако телефонот по сушењето нормално се вклучи и сè изгледа во ред, не заклучувајте веднаш дека проблемот е целосно решен.
Прво направете резервна копија од важните фотографии, контакти, документи и други податоци.
Тоа е веројатно најкорисната работа што можете да ја направите откако телефонот ќе се „врати во живот“. Ако морската вода сепак предизвикала оштетување во внатрешноста на уредот, подобро е најважните податоци веќе да бидат зачувани.
И запомнете ја најкратката верзија на овој водич: извадете го телефонот, исклучете го, отстранете ја морската вода според препораките на производителот, исушете го без топлина и не приклучувајте го веднаш на полнач. Оризот прескокнете го.
Извор: webmind.rs
